POR FIN, CHEGARON

Pois xa está aquí o Nadal e nós desexando descansar, foron uns meses intensos e cheos de traballo; agora si podemos gozar dunhas merecidas vacacións. Pero, malia os desexos de pasar estas datas en compaña da familia, das nosas amizades e de ansiar o esquecemento dos exames, traballos e todo tipo de probas, debemos tamén facer un repaso e análise do realizado durante o trimestre e volver con ganas de superar os erros e emendar aquilo que non resultou nas distintas materias. 

Para relaxarnos, achegámosvos esta fermosa panxoliña que o profesorado vai interpretar o vindeiro venres no concerto do centro onde todos e todas ides participar. Con isto queremos acompañarvos e dar tamén o noso pequeno gran de area nese gran concerto que levades preparando durante o trimestre na aula de Música.

MODELO DE COMENTARIO

Despois da corrección do primeiro comentario de texto, concluímos que non foi fácil e que non todas e todos lle dedicamos o tempo e o esforzo suficiente. Para que nos sirva de modelo para a próxima vez, botádelle un ollo ao comentario que tedes a seguir de "Lume no pazo", Cabanillas. O texto está refeito da mestura de dous dos vosos compañeiros: Felipe e Clara. Cantos máis fagades, mellor vos saíran, ánimo que aínda queda moito por percorrer.

ANXO MOURE E O APALPADOR

No día de onte, tivemos unha visita moi interesante. Anxo Moure chegou ás Bizocas para contarnos uns fermosos contos cheos de simboloxía e de amor pola natureza. De 1º a 4º  todas e todos fomos pasando pola Biblioteca para pararnos a escoitar como o Apalpador do Courel chegou a Laponia e de aí saíu o famoso Noel. Abraiámonos con Anxo que, antes de acudir ao centro, ala polas sete da mañá decidiu darse un baño na praia para logo chegar e transmitirnos as súas fermosas historias, así como poñernos fermosas imaxes do Courel.

Mirade as fotos e vede cantos Apalpadores hai n'as Bizocas.

Visita de Anxo Moure on PhotoPeach

DÍA DA NON VIOLENCIA DE XÉNERO

E como non podía ser doutro xeito, o EDL e o centro en xeral non puideron deixar de colaborar para que non nos esquezamos das mulleres que sofren no mundo a causa da intolerancia e da violencia. As nosas escaleiras teñen nos seus chanzos mensaxes, parágrafos de cancións e incluso poemas que dun xeito ou doutro critican a situación na que se atopan moitas féminas. Tampouco nos esquecemos do Día Mundial dos Dereitos da Infancia e, para os máis pequechos que non o estan a pasar nada ben, tamén tivemos unhas palabras. Amosámosvos a parte que lle correspondeu á lingua galega, mais non deixedes de observar tamén o curruncho que lle adicou o castelán, o francés e tamén o inglés. 

Pero o traballo no que máis tempo investimos foi no proxecto: SOMOS IGUAIS, TECEMOS POLA IGUALDADE. O alumnado de 4º ESO non tivo reparos en tecer os nosos particulares lazos lilas para demostrar que nós si rompemos roles aplicados a homes e mulleres. No IES As Bizocas todos calcetamos, homes e mulleres, e fixémolo por unha boa causa: queriamos demostrar que somos diferentes, pero iguais. Non vos perdades o vídeo de elaboración do traballo que nos levou dende comezos de curso. O resultado, xa sabedes, podedes observalo no corredor do centro, preto da Biblioteca.
Clicade na imaxe.

GAÑADORA do Samaín Pescudador

Pois, xa temos gañadora do concurso de relatos curtos organizado para 3º e 4º ESO, pero como tamén nos gustou moito o segundo candidato, decidimos darlles cadanseu premio, polo que tamén poderedes ler o relato de Felipe Álvarez, Que lle pasou a Bieito?

O primeiro premio foi para Silvia Cousido co seu texto, Acudídeme miñas zancas!

Non teñades preguiza, como o alumnado de 1º e 2º que non se animou a participar, e lede os relatos gañadores. 

Parabéns aos dous.

ADRO VELLO

O alumnado de Cultura Clásica e Latín quixo ir visitar a necrópole de Adro Vello, unhas ruínas da época romana convertidas posteriormente nun lugar onde foron enterradas cantidade de persoas e onde máis tarde se situou unha igrexa visigótica e incluso unha fortificación na Baixa Idade Media. Ao querer construír unha urbanización descubriron estes xacementos que dan conta das nosas raíces e que nós quixemos ir ver de primeira man. Así pois, botámonos a andar e en pouco máis de media hora chegamos á praia d'O Carreiro, non sen antes pasar polo Adro Novo, a igrexa de San Vicente a onde foi levada o anterior edificio visigótico. A visita foi pracenteira, mais provocounos certa tristura ver a situación na que se atopa a necróple. Consideramos que o noso patrimonio merece uns coidados mellores. Vede as fotos e opinade.

Adro Vello

Leer más publicaciones en Calaméo

SAMAÍN PESCUDADOR

Chega o Samaín e de novo precisamos de vós, botádelle un ollo aos documentos e animádevos a participar. En todos os tabaloreiros das vosas aulas, así como na Biblioteca, tedes información. Chega pois o momento de pescudar sobre esta data e tamén de serdes creativos.

CONCURSOS SAMAÍN 

COMEZAMOS A TRABALLAR, 1ª TAREFA

Desta volta, tócalle a 3º ESO; deberedes contribuír a dinamizar o noso taboleiro, ese que xira arredor da lingua e da cultura galega.

Durante o que resta deste mes, tedes que ir xunta del e fixarvos moito no que alí hai colocado. Observade as viñetas e as noticias que se atopan no mapa de Galicia, situado á dereita do citado taboleiro. Unha vez feito isto, entraredes en comentarios e falaredes da viñeta ou noticia que máis vos agradou, vos impresionou ou vos resultou máis curiosa. Para que todos e todas nós saibamos do que estades a falar, debedes describir con precisión o que nela observades graficamente, así como tamén os diálogos que se manteñen. No caso de tratarse dunha noticia, simplemente diredes de que trata e, a continuación, daredes a vosa opinión, o voso parecer sobre o que alí observastes, así como a razón da vosa escolla.

Ánimo e a traballar.

CURSO 2018/2019

Curso novo, vida nova. Comezamos a nosa andaina e esperamos que este curso 2018/2019 sexa do maís frutífero en todos os aspectos, mais sobre todo no lingüístico. A vida cultural galega e o fomento do uso da nosa lingua será o principal obxectivo deste equipo que, con ideas novas e outras xa máis antigas, desexamos botar a andar e ir paseniño, pero con pasos seguros e avances certeiros.

Temos xa configurado o EDL cunha morea de alumnado desexoso de traballar a prol do uso do galego; por iso esperamos que as actividades, que iremos realizando durante todo o curso, sexan do agrado de toda a comunidade educativa.

Para comezar, botádelle un ollo ao taboleiro da lingua que, como o curso anterior, está situado na entrada principal, ao lado da conserxería. Nel tedes unha serie de bandas deseñadas que nos serven para rir, mais tamén para reflexionar. 

Benvidas e benvidos a todos/as, bo curso, e non esquezades usar un chisco máis do habitual a lingua galega. 

28 DE MAIO, INTERCAMBIO LINGÜÍSTICO CULTURAL

E, como faltaba a segunda parte desta actividade iniciada o pasado mes, volvemos reunirnos cos compañeiros e compañeiras de Lousame, mais desta vez fomos nós os que tivemos que viaxar. Por iso, ben cediño collemos rumbo a este concello para pasar unha xornada enteira con quen coñecemos antes a través de cartas e despois xa en persoa o 17 de abril. 

Recibíronnos estupendamente, á quentura dun bo chocolate con rosca, así collemos forzas para irmos ata as minas de San Finx onde atendemos con moita curiosidade á charla que Maite Sobradelo nos ofreceu. Con ela puidemos relacionar todo o que ocorreu neste poboado cos coñecementos que xa tiñamos despois de ler a obra de Héctor Carré, Febre. A seguir, pasamos ao concello veciño e Concha encargouse de darnos un percorrido pola vila amosándonos o máis característico desta. Xa cansos, fomos ata Baroña e nos seus castros repuxemos forzas co xantar para rematar xogando na praia. 

E como todo remata, pois o noso día tamén, e a iso das cinco chegamos outra vez ao CPI Cernadas de Castro e, malia que nos levou un bo anaco despedírmonos, tivemos que iniciar o camiño de volta cara ao Grove.

Foi unha experiencia fantástica que queda para o recordo e que, dende logo, pensamos repetir nos anos vindeiros.

Intercambio I (CPI Cernadas de Castro_Autobús) on PhotoPeach Intercambio II (Autobús_Minas de San Finx) on PhotoPeach Intercambio III (Minas_Noia) on PhotoPeach Intercambio IV (Noia_Baroña) on PhotoPeach Intercambio V (Despedida) on PhotoPeach Intercambio VI (Ata á próxima) on PhotoPeach

E SEGUIMOS COAS LETRAS GALEGAS

E como xa dixeramos, este venres celebramos o día cultural no centro e dentro das múltiples actividades organizadas, contamos tamén coa presenza de Celso Sanmartin.

Cómpre recordar que as letras galegas non deben ser obxecto de festividade dun único día, senón de todos e cada un dos 365 que ten o ano. Por esta razón, nós seguimos de festa e decidimos que ninguén mellor que Celso para axudarnos a celebrar esta efeméride.

Coas súas palabras quedas e esa arte para transmitir a paixón e o amor pola comunicación e a oralidade, Celso agasallounos con fermosas historias cheas de misterio, sabedoría e sobre todo cheas da esencia de Galicia e dos nosos maiores, fonte de inspiración do que nos conta.

Foron dúas horas que nos pasaron nun suspiro e, algunhas de nós, aínda tivemos a sorte de poder conversar un chisco máis con el.

Grazas polo teu bo facer, agardámoste na seguinte volta do camiño.

Visita de Celso Sanmartín on PhotoPeach

FELIZ 17 DE MAIO

E botando man de Davila e das súas sempre oportunas viñetas, aí van algunhas destes anos anteriores. Facendo eco daquilo que afirma que o día das letras galegas debemos celebralo todo o ano, non esquezades que o venres 18 teremos O día Cultural no IES As Bizocas e que contaremos coa presenza de Celso Sanmartín.

Esperamos que teñades un bo día.

ANAGNÓRISE E A BANDA DA LOBA

Pois como o vindeiro xoves, os de 2º ESO van ir ver a representación teatral de Anagnórise á vila veciña de Cambados, non imos deixar de recordarlles que o grupo A banda da Loba quere compartir connosco a súa última canción inspirada na novela de Mª Victoria Moreno. Como elas mesmo afirman: "homenaxeamos a esta autora que lemos de nenas e que nos inspirou coa súa novela para despregar as ás, voar e construír este universo".

Agardamos que vos guste.

E xa que estamos, deixámosvos o telexornal que, como todos os anos, realiza o CPI dos Dices e que nos axuda a ter unha visión clara, didáctica e sintética da homenaxeada no día das Letras.

LETRAS GALEGAS 2018

E está a piques de chegar o día, achégase o 17 e nós non paramos pois Mª Victoria Moreno ben o merece. Por iso, aproveitando o material que nos ofrece o Seminario Galán, constuímos un mural para que todas e todos poidamos achegarnos máis á figura homenaxeada desta vez. Dentro das actividades programadas, contaremos coa presenza de Celso Sanmartín, mais diso xa vos iremos contando.

Mª Victoria Moreno on PhotoPeach

CORRELINGUA EN PONTEVEDRA

E corremos, vaia se corremos e todo pola nosa lingua. Un ano máis, o IES As Bizocas non quixo deixar de loitar polo galego e acudiu a Pontevedra para, en compaña doutros centros, percorrer a cidade e rematar bailando ao son da música do grupo que este ano gañou o Cantalingua. Eramos moitos, máis fan falta moitos máis, a lingua ben o merece, non credes?


Correlingua I on PhotoPeach Correlingua II on PhotoPeach

E CHEGOU O DÍA 17

Á fin, puidemos coñecer aos nosos amigos e amigas do CPI Cernadas de Castro de Lousame. Hoxe, ás nove e cuarto da mañá chegaban dende alá para coñecer a nosa vila e o noso instituto. Subimos á aula de Teconoloxía onde nos fomos presentando e a seguir fixemos un percorrido pol'O Grove: a illa da Toxa, a aldea dos Grobits, porto Meloxo, a fabrica de salazón onde un funcionario do concello nos explicou todo o relacionado con esta arte, a Siradella, a propia vila, onde comemos, e rematamos na máis fermosa das praias, A Lanzada. Foi unha mañá intensa onde ademais aproveitamos para facer pequenas camiñadas, como a de porto Meloxo ou a Siradella. Ademais, o máis interesante foi coñecérmonos e sobre todo falar entre nós, aínda que había unha condición: tiña que ser en LINGUA GALEGA.

Por hoxe rematamos, mais agora esperamos con ganas a viaxe de volta, tócanos a nós ir a Lousame e iso será o vindeiro 30 de maio. Agardamos con impaciencia.

Intercambio on PhotoPeach Intercambio II on PhotoPeach Intercambio III on PhotoPeach

INTERCAMBIO CON LOUSAME

Dentro do proxecto do EDL tiñamos planificado un intercambio cultural e lingüístico cun cole de Lousame, o CPI Cernadas de Castro, e xa chegou o momento de vérmonos.

Con grande entusiasmo por parte do alumnado de ambos os institutos, comezaron despois das vacacións a redactar unhas cartas que xa chegaron aos seus correspondentes destinos.

Todas e todos acabaron emparellados polas súas profesoras e cada un escribiu sobre os seus gustos, afeccións, familia, forma de ser e de actuar... Esta semana, á fin recibimos correspondencia e xa xabemos algo dos nosos futuros visitantes, así como tamén unha foto de conxunto, aínda que sen nome; quen é quen? Isó saberémolo o vindeiro martes que será o día no que os recibiremos e procuraremos ensinarlles a nosa vila.

No noso taboleiro da lingua colgamos as súas fotos para telas ben presentes no que resta da semana.

E aquí tedes unha mostra do sobre onde ían as nosas cartas

E se queredes ver con que concentración lían as nosas cartas, aí vai unha mostra.

MARÍA VÍCTORIA MORENO

Para írmonos poñendo en contexto, aí vai o enlace ao proxecto da Real Academia Galega, onde atoparedes recursos para traballar a figura da homenaxeada o Día das Letras no 2018.
Clicade na imaxe e iredes directamente.

HUMOR E REFLEXIÓN

Non debería ser así, pero é.

CANTIGAS DE AMIGO E NEOTROBADORISMO

Pois, rematada xa a literatura medieval en 3º ESO e a literatura de vangarda en 4º, o alumnado dos cursos máis baixos púxose a elaborar cantigas de amigo modernas. O obxectivo, demostrarlles aos de 4º que eles tamén podían facer de trobadores improvisados e chegar a compoñer igual que o facían os autores que escribiron seguindo o coñecido movemento de vangarda galego: O neotrobadorismo.

Aquí tedes os resultado. Lede e xulgade, podedes comentar.

VISITA DE LEDICIA COSTAS

Hoxe tivemos unha visita especial no centro; Ledicia Costas veunos falar de dous dos seus libros: Unha estrela no vento e O corazón de Xúpiter, lidos respectivamente polo alumnado de 2º e 3º ESO.

Os e as integrantes do club de lectura fixeron unha bonita presentación e, a seguir, a autora explicounos todo aquilo que quixemos saber sobre ela, a súa profesión, os seus gustos e, sobre todo, os libros que lemos.
Aquí tedes as fotos.

24 DE FEBREIRO, DÍA DE ROSALÍA

Con gran acollida foi recibida a actividade que o EDL e a Biblioteca deseñaron para conmemorar o nacemento da máis ilustre escritora do século XIX. O día de Rosalía comezou o venres pasado no IES As Bizocas e rematou hoxe, luns, cunha boa participación por parte de toda a comunidade educativa.

Imitando a Carlos Negro e a súa fantástica idea

de repartir polos bares do concello de Ames

versos de Rosalía en anos anteriores, decidimos que o alumnado do club de lectura entregase tamén anacos da obra rosaliana durante o recreo do venres 23 ao profesorado, o alumnado e o persoal non docente. Todos e todas tivemos que gardar a nosa tarxeta e memorizala durante a fin de semana para, á fin, facer un sorteo entre todos os versos. 

Así pois, durante o segundo recreo saíu unha papeleta, a de Paula de 4º B, que recitou o seu poema perfectamente e tamén entregou a súa papeleta, polo que recibiu un bonito agasallo: unha cunca coa cara de Rosalía e uns versos da nosa autora. Parabéns para Paula e a para todos e todas os que recibistes a actividade con tanto entusiasmo.